PATHIEN SANDAMNA ROPUI

Text : Ama chun ei thilthaw hai ang ni lovin, ama ruot le a lunginsietna ang lemin a mi sandam a, kona thienghlimin a mi ko bawk a, chu lunginsietna chu hun hrim intran hmȃn Krista Isu-a chun a mi pek an tah; 2Timothe 1:9

Nakie chun, “Ei sukdiknaw tawp el a, Vawisun hi chanchin lawmum intlun ni a nih, ei ni hi ei to zing el a. Khawvar ei nghȃk chun hrem tuok el ei tih. Tuhin thaw ta u, lal sȗnghai va hril ei tiu” tȋn an inbiek a (2Lalhai 7:9). 

‘Hun hrim intran hmȃn’ a ti hin ngaituona sei tak a mȋn nei tir a. Hun hi iengtika intran am ei ti chun, Pathienin thilsiem a tran hun Genesis 1:1 ‘A tirin Pathienin hnuoi le vȃnhai a siem a’ ti hi a dawnna ni ngei a tih. Ei chengna khawvel hi Bible Besana sut chun kum 6000 a upa chu a ni ta a, khawvel thiemna hmanga sut ruok chun kum tlukledingawn li le a chanve (4.5 billion) lai a ni tah.  Hun intran hma khawmin Pathien chu a lo um ta a, a lunginsietna khawm a la hung inlang ding mihriemhai kuomah suklangin a lo um tah.

Pathien thilsiem le thilthaw tinrȇnga hin Krista hung inlangna ding hi suklang le tȃrlangin a lo um hlak a, hnuoi chung elvartu dinga Ni le Thla le Arasi hai a siem hma khawmin, tuipui inthȗk tak, inthim mup elvartu dingin var siemin a lo um tah Genesis 1:3. Ni le Thla hai siem anni hmaa Var siema um hi ieng Var am ning a ta ti hi mi tam tak zawna, a dawnna chieng tak hmu thei le hril thei nilo a nih. Amiruokchu Krista, khawvel elvartu dinga peka ei um ding suklangna a nih ti inlakhawm hril zawm thei tak a nih. Var chu inthim lai a hung var a, inthimin chu chu a hriet phak nawh (chu chu a dang zo nawh) Johan 1:5. Bawsietna suol leia Krista pȇka ei umna dinga Pathien chatuon remruotna hi, a tekhinna hriet awlsam tak chu – Nu le Pa haiin, naute nu phȋng sȗnga insieng mȇk, a hmel la hmu khawm ni si lo, an hmangaina po po suklanga naute ta dinga thiltha ni awma an hriethai po po chu, sul sȗnga a um lai khawmin an lo thaw hlak ang hi a nih. 

Pathien sandamna hi a man pek ruol annaw a, pȇk ruol nisienkhawm pȇkna hun a mi siem peknawna tak hi a ropui zuolna a nih. Mihriem hmasa Adam le Evi hai bawsietna leia Krista pȇka ei um ding hi Pathien remruotna a ni a, an thilthra thaw leia Pathien lunginsietna hlawsuokna lei an nawh ti chu chieng takin an lang. Sul sȗnga ka siem hma che khawmin ka hriet che a, I pieng hma khawmin ka sukthieng ta che a….. (Jeremi 1: 5). Jeremi kuoma Pathien thu hung tlung hi a ropui ngawt el. Sul sȗnga a siem anthawk le a pieng anthawk khawm nilo, a siem hma le pieng hma anthawka Pathienin a lo hriet le sukthieng a nih. Pathien mi thlangna hi ei tlin le fel lei nilo, fello dinga ei insieng le pieng hma anthawk khawmin a mi lo thlang ta hai ei nih. 

Pathien lunginsiet sandamna hi thu le thilthaw in tarlang le suklangin um sienkhawm, tisaa a hung inchangna ruok chu, hun intran anthawk kum sangli lȃi vȇl zet liem hnungin a hung inlang cho a nih. Chun Thu chu taksȃn a hung inchang a, eini lȃi a hung um ta a, Pathien naupasal neisun ropui angin a ropui zie ei hmuh, lunginsietna le thutak in a sip (Johan 1:14)

Thu taksaa a hung inlang ding tak chun, setanin nasatakin thranghmun a khaw a, Isu a pieng anthawk a thi a, a thonawkna chenin dodalna hmangruo tinreng hmang sienkhawm, Pathien remruotna chu dang ruol an nawh. Chu a hmangaina dawngtu le changtu hai chu a ropui zie puongsuok dingin a mi dit a. Pathien mi hmang thei dingin ei lampui hi ei hraw fuk am ti hi sut ngun a trȗl.

Suria lal Ben-Hadad-in a sipai po po kokhawma Samaria khuo an inhuol lai khan, sanhimna sinthawtu dinga Pathien mi hmang hai kha, kul puotienga um, mi laia cheng tlȃk nilo phar pali hai kha an nih. An meeting agenda kha a khir ngawt el, damkhawsuokna le thina thu a nih. An lampui hraw ding an thlang fuknaw hlau chun an tawpna chu thina a nih. Amiruokchu Pathien hmang thei dingin an lampui hraw dinga thutlȗkna an siem kha an va siemfuk de aw!! ‘…Ieng dinga thi nghak ela ei inthrung zing am a na?’, ‘Khawpui sȗngah lȗt el ei tiu khai’ ti ding ni inla, khawsung an trȃma, ei va thi el awm si a. Chun hi taka hin thrung zing inla, ei thi tho tho bawk awm si a. Chuleiin thaw ta u, Suria sipaihai tieng hin tlu lȗt rawk el ei tiu. An mi hla le ei hring nȋng a ta; an mi that le hlak ei thi nȋng a ta,’ tiin an in biek a (2Lalhai 7:3-4). 

Phar pali hai hi, Pathien anthawk mitvarna an nei tinaw ruol an nawh, an mamaw umna chu Suria sipaihai tieng a nih ti an hriet a, amiruokchu chu chu chang ding chun Suria sipai tam takhai khawm thi huoma nerthleng ngam dingin huoisenna an nei a nih. An lampui hraw hi Lalpa hmang nuomna le tumna lampui a ni leiin, natna nei le phȋngtrȃm chau hnung ke pen ri khawm, tawlailir ri, sipai tam tak le Sakawr tam tak ri angin Suria sipai hai naa chun an ri tir tlat a nih. 

Hieng ang lawma sandamna ropui dawngtu hai hi, thi nghȃkin ei inthrung el ding maw! Nakie chun, “Ei sukdiknaw tawp el a, Vawisun hi chanchin lawmum intlun ni a nih, ei ni hi ei to zing el a. Khawvar ei nghȃk chun hrem tuok el ei tih. Tuhin thaw ta u, lal sȗnghai va hril ei tiu” tȋn an inbiek a (2Lalhai 7:9). 

Sanhimna sinthaw dingin lal le a sipai hai po po huolde in um hai sienkhawm, phar pali hai ngei khawm ropui taka hmang theitu le hmang nuomtu Pathien hin, nang le kei khawm ropui takin a mi hmang nuom a nih. Hmang thei dingin ei lampui hraw hi Lalpa mi hmang nuomna le hmang tumna a ni am ti ruok chu sȗt ngun a trȗl. 

Chuleiin, a lunginsietna zara kona thienghlima a mi ko le sandam hai hin, Lalpa mi hmang nuomna le tumna lampui hraw dingin fimkhur ei tiu.

Lalpan malsawm raw seh.

Amen…