KHAWVEL MIHAI HRIETLO HRETU

-Upa Zadinlien Hmar

Text : Ka leng malama, chibai in bukhai ka en laiin, maicham pakhat chungah, “HRIETNAW PATHIEN TA DING,” tia ziek ka hmu a nih. Chuong chun hre lova chibai inbuk hlak kha, ama thu chu ka hril cheu a ni hi. Tirko Thilthawhai 17:23

Pathien varnaa chun khawvelin varna hmanga Pathien an hriet theinaw hnungin, thuhril invet hmanga a ringtuhai sandam chu Pathienin tha a ti hle si a. (1Kor. 1:21)

Isu pieng hma BC 430 hnungtieng khan Greek khawpui Athens (Atheni)-ah hri an leng ta rak el a. Indo lai a ni leiin mithi ruong le Sathi ruong anthawk chun natna hrik hung umin, hripui chun khawpui chu a tuom vel chiem el tah a. An ngaidan chun pathien hai laia pakhat tak an suklungawinaw leia hremna tuokah an in ngai a, a buoitlakna lai tak chu ieng pathien tak am an suklungawinaw ti an hrietnawna chu a nih. 

Atheni khuo hi pathien khawpui ti thei hiel khawpin an kawtthlera hai chun pathien lim chi hrang hrang chu a de fur el a. Ieng pathien tak am an suklungninaw ti hrietna dinga thurawn petu ding Kupra (Cyprus) thlierkara mi a hming Epiminides nia an hril chu an incha suok tah a, chu pa chun hieng hin thurawn a pek tah a nih. Beram rawng hrang hrang, a bik taka vai hai chu phingtam taka sie in, ‘Mars Hills’ (Tirko thilthawhai-a Paula Thuhrilna hmun Aroepagi an ti hmun) a chun, chu beram hai hai insuo’ng an ta, hlobet pet lova beram hai an bawkna hmun peia chun ‘Hrietlo Pathien’ puolin hmun thienghlim siemin inthawina an inhlan ding a nih.

Chuong ang tak chun chu khaw mi hai chun an thaw ta a, mak tak elin hri khawm chu a re tah an tih. Lirnghing leiin chu hmun thienghlim an siem hai chu iemani zat a se ta nuol a, a siet mahla la umsun hai chu, Tirko Paula’n rawngbawla an zin tumin a hmu a, an hrietlo Pathien chu a chanchintha khekpui Isu Krista ngei hi a nih tiin Atheni mipui hai kuomah chanchintha a hril a nih.

‘Amaa mizie hmu thei lo, a chatuon thilthawtheina le a Pathien ni zie chu, leihnuoi siem tira inthawkin chiengtaka hmuin a um ti a thilsiema chun anlang a nih, chuleichun suonlam ding an nei nawh’ Rom 1:20. Iengkim siemtu le indintu Pathien a um ngei a nih ti a thilsiem haia khawm chieng takin an lang a, a siemtu chawimawi nekin a thilsiemhai buoipui le sawlpuiin khawvel hnamtin an buoi a nih. 

Pathien chatuon remruotna inthup le ropui zie hi, Thlarau thienhlim thang lova khawvel thiemna hmanga suisuok ruol an nawh. Nisienla chu nang le kei hi chanse tak ning ei tih. Thlarau thienghlim thangpuina zarin mi mawl le hnuoihnung tak hai khawma, chiengtak le fie taka ei hmu le hrietthiem thei dinga Pathien thuruk inthup a ni tlat leiin, ‘Pathien varnaa chun khawvelin varna hmanga Pathien an hriet theinaw hnungin, thuhril invet hmanga a ringtuhai sandam chu Pathienin tha a ti hle si a’. (1Kor. 1:21)

Chungtieng kona hretu Abhram chu malsawmin a um a, a suok ruola suok ve a unaupa Lota ruok chu hriet nei lova suok a ni leiin Abhram ta dinga harsatna siemtu a ni a, a tawpa chun in thepui  ngai hiel a ni kha. Hriet neilo, hriet nei hai hnungzui le anruola rawngbawlna huonga lut ve mei mei am ei ni ti khawm ngaituo um tam tak um mei ei tih. Abhram chun a hriet chu ring a um a nih ti a hrietchieng leiin ringum takin a zui a, Hnam thar le Sakhaw thar indinna dinga hmangraw bulpui tak ni dinga Pathien hmangruo a hung nih. Ama anthawka khawvel hnamtin damna Isu Krista hung suok ding a ni leiin, a piengna ram maksana hriet ngailo ram lut dinga kona chu a hrietchieng em leiin, a kotu chu ring a um a nih ti hre-in huoisen takin a zui a ni kha. A hriet ang hre ve lo, a hmu ang hmu velo hai thlirna mit anthawk chun invettlak tak a nih.

Mosie ngei khawmin hmu thei Aigupta ropuina le hausakna chu hnawlin, hmu theinaw chu hmu-in Pathien mihai le suknawmnat tuor a thlang lem kha (Heb. 11:24-25). Saula (Paula) khawm Damaska khaw kawlah hmu theinaw chu hmu-in, khawvel mihai hrietlo chu a hriet a, dodaltu anthawkin a dodalhai anga um dingin a nun sukdanglam a hung nih. (Thilthawhai 9:1ff)

Khawvel nuomsip bawlna chu chenin hlimna an zawnga an hmu nawh. Khawvel hausakna le ropuina in lungawina an zawnga, lungawina tluontling an hmu zo chuong nawh.  Khawvel mihai hrietlo hretu, an hmulo hmutu le an neilo neitu ei ni hi ei vangnei hle. Mi rimsie le riengvai, chansie le pasie angin mi ngaihai sienkhawm, Krista neitu hai chu Lungngai angin, nisienlakhawm lawm rawp siin, mi rimsi angin, nisienlakhawm mi tam tak sukhausa siin, iengkhawm neilo angin, iengkim hau siin. (2Kor. 6:10) Chu rama chun Lalpan a min chengtir a, khawvel hausakna in a pek theilo hausakna thuruk, khawvel thiemna in a pek theilo hrietthiemna, khawvel varna in a hrilfie theilo nun hlimna neitu hai ei ni hi ei vangnei hle.

Lalpan Malsawm raw se. AMEN