LEADERSHIP QUALITIES

 LEADERSHIP QUALITIES

-Upa Zadinlien Hmar

Text : Chun Mosie chun Israelmihai laia inthokin mi thei deu deu a thlang suok a, anni chu mipui luhai ni dingin: Sangkhat chunga roreltu dam, Zakhat chunga roreltu dam, Sawmnga chunga roreltu dam, Sawmkhat chunga roreltuhai damin a siem ta a. Exodus 18:25

Text : Keinirawi hi Krista rawngbawltu le Pathien thuruk enkawltuah min mi ngai raw hai se, Hitaka hin enkawltuhai chu mi ringum ni a ngai bawk a nih. 1Kor 4:1

‘Thuoitu chu lampui chin hrie, fe hmasa a, ama zui dinga mi danghai hipkei thei hi a nih’

Dr. John R. Mott

Thuoitu sin hi, a then an inhawk a, a thenin an huphur em em hlak. A tlaklo ding haiin an inhawk a, a tlak ding haiin an huphur hlak mani ti dingin a um. A bikin Kohran in enkawlna le Pathien ram rawngbawlnaa thuoitu ni hi sin namenlo tak a nih. Amiruokchu, mawphurna liengkova innghat a ni ta si chun, thlatlam le ngaitha thieng a ni nawh. Mawphurna hlensuok dinga theitawpsuo a ngai hlak.

Kohrana hin Department hrang hrang umin, Chuong department hai chu Section/Group hrang hranga thresawmin, thuoitu ei in siem hlak. Mosie in Israel hai a thuoina kawngah a thasang dawltu ding le mipuihai enkawlna kawnga a felfai lemna dingin, thuoitu hrang hrang a ruot ti ei hmu. Hieng thuoitu hai hi a nep bik le chin bik um chuong lovin, ei mawphurna le sinah ei pawimaw seng a nih. Thuoitu mawphurna ei phur chara ei hrietzing ding le ei zawm dinga thiltha tlawmte sawpsuok ei tih.

1. ZE NGHET NEI MI A NI DING A NIH: Thuoitu chu ze nghet neilo, khawlai tawng le mi dang dang tawngbau suok leia ngaidan le dit dan thlak zung zung mi a ni ding an nawh. A pawl thuoi thiltum chu hre in, hmathlir nei mi le, pawl thiltum sukpuitling dinga tum dan le remruotna mumaltak neiin pawl chu a thuoi ding a nih. Mi dang ngaidana innghat taluo chu an suitlu hlak. Mi dang lakah thurawn lakhawm sienkhawm, chu thurawn po po chu pawm vawng ding tina nilovin, thurawn a lakkhawmhai chu thlitfimin pawl ta dinga a thatak ding ngaituo in hma a lak ding a nih. 

Pawl dangin thil an thaw leia an thaw ang ang lo thaw ve tum nghal le, lo inhnar ve nghal mi a ni ding an nawh. Pawl ta dinga thiltha tak ding ngaituo in, a pawl thuoi inmila hmadawm a siem thiem a pawimaw hle. Pawl thiltum le hmalakna chu huoitakin a phursuok ding a ni a, mi ngaidan ding le sawiselna a veng ding a ni nawh.

2. MI LUNGRIL ZAU A NI DING A NIH: Thuoitu chun, mi ze hrang hrang nei, nina hrang hrang le ngaidan le dit dan in anglo tak tak enkawltu ding le thuoitu ding a nih ti an hriet ding a nih. Tawng dan chintawk hrelo le tawngbau dittuilo tam tak khawm hmasuon chang nei a ta, chuong huna chun, a laklut dan le dawng sawng dan a thiem a ngai hlak. Sawiselna le elselna tinreng chu nat pha nan a hmang ding annaw a, chuongnaw chun a hmalakna a thuonawp thei a nih. Sawiselna le hrilsietna hai chu a dawnlet ding annaw a, a hnawtzui ding a ni bawk nawh. Chuongnaw chun a rawngbawlna le mawphurna a  bahla thei a nih. 

Lamlawn laiin, lamsira Ui milo inbau taphawt lunga I deng chun, re tieng nekin inbau nasa deu deu ata, a khela Ui dang hai khawm lo inbau ve pei an tih. Lamsira lo inbau hai kha uksak lovin, I kalpen sukhrattu ni lem raw hai se.

Famtah, Pu L.Keivawm, thuziek mi le miril kha zawna an indawna. A thuziek sawiseltu hai iengleia a dawnlet nghainaw am ti thu an indawn chun, Hlo tlo laia vahnawma ramsa hung inhram taphawt ei hnawt pei chun, sin min thawtir hman an tim! a ti kha umzie a um ngawt el. ei rawngbawlnaa hin, thaw nei siloa a sira ukil sin lo thawhai hi ei hnawtzui pei chun, ei rawngbawlna sin hi ei thaw hmannaw ding a nih. 

Lungril zau, thu sie le tha dawngsawng thiem a, mani insukhratna dinga hmangthiem hi thuoitu tha chun a thaw ding a nih.

3. MI INSUMTHEI LE THU-IP THEI A NI DING A NIH: Thuoitu tha chu a hun le hmun zirin iengkima insum thei a ni ding a nih. Tawngkam fimkhur a ngaia, tawngbau thlada le dittuilo chun mi a hnawtzam hlak. A tawngbau le thilthaw-in mi a huoikhawm hne ding a nih.

Thu hrilsuok ding le ip ding chin a thlierhran thiem ding a nih. Lungril-a um po po hrilsuok zawt zawt a, committee boruok thalo le puotieng mi hriet dinga mawilo tam tak a um chang um a tih. Committee zawla tawp ding chin thiltlung le thu buorchuor hai chu committee a tawp le inruola lungril anthawka peihawn a trul hun a um. Pawl muolpho theina lakah thuruk tobo pui ngai chu khawlai khawm suksuoklo dinga insumthei le thu-ip thei a ni ding a nih.

4. THUTHLUKNA SIEM THIEM MI A NI DING A NIH: Hun khir le harsa, emergency thilah thuthlukna siem thiem hi Thuoitu tha nina pawimaw tak a nih. Thuthlukna khawm nei mumal theilo, mi dang hrietna le ngaidana innghat ringawt chun, pawlin a tuor hun a um hlak. Committee zawlah thuthlukna siem thiem el khelah, puotieng thil trul le pawimaw hunah, ruohmanna le remruotna siem thiem zung zung mi ni hi a pawimaw hle.

5. MI INVAWNG LE INCHEI ULUK MI A NI DING A NIH: Mi min zana pakhat chu puotieng inlang dan le inchei dan hi a nih. Thuoitu ni chun invawngfai le incheina kawnga khawm in uluka, mipui laia hmu khawma, mi mi chung en thei ding khawpa invawngfai le, an mi hriet hrang thei ding khawpa mi naran danghai neka in uluk hi thuoitu tha chun a thaw ding a nih. Mi dang thuhne thei ding le thuoi thei ding chun mi dang neka pen tam tak pen hi a pawimaw.

6. MI INTHUNUN THEI A NI DING A NIH: Thuoitu seng seng, thawpui thei le, lungril inhmupui thei deu nei chun, ei rawngbawlna ei la chiengnaw tina a nih. Ei thawpui hai po po angkhat vawnga inthuruolpuia, rawngbawlna hmadawm dawm tlangpui thei dinga lungril inthunun thei mi a ni ding a nih. 

A nun a vawng uluk ding a na, puotieng thlira mawilo le rawngbawlna le inmillova nun thlada chun a rawngbawlna a sukmuolpho a nih. 

7. HMATHLIR NEIIN A PHURSUOK DING A NIH: Thuoitu chu a tam lem ngaidan lakhawmtu ni lovin, pawl ta dinga hmathlir le ruohmangna mumal tak neiin, chu a hmathlir sukpuitling dinga mi tam lem thuhne le hipko thei mi a ni ding a nih. Committee zawlah a tam lem lem ngaidan laka thuthlukna siem ngawt ni lovin, ngaidan inkawkal nuoi le ditdan in anglo tam takhai chu, a hmathlir sukpuitling a ni theina dinga hmalapuitu ding le pawmpui thei ding khawpa remruotna feltak a nei ding a nih.

Hmathlir neilo, hmadawm mumal siemlo, a remchang le hun inher ang peia inherliempui el hlak chun, a pawl thuoi chu hla tak thuoitlung thei ngainaw nih.

8. THUOITU THA CHUN THUOITU THA A SERSUOK DING A NIH: Thuoitu chu Thuoitu a ni kumhlun naw ding a ni leiin, a nina la hung phur thei ding mi tha le ringtlak a sersuok tum ding a nih. A mawphurna hung phur sawngtu chu tawnhriet neilo, mi thar a ni el thei. A suoksan hnung khawmin thlatlam el lovin, a khata mawphurna a phur thei ding hma chu a suizui pui ding a nih. 

Hienghai baka khawm hin thil tam tak um a tih, ei hril seng nawh. A bikin ringtuhai ei rawngbawlna zawna mawphurna ei phur a hin, mihaiin Krista rawngbawltu ah an mi ruot thei ding am ti hi ei in enfie a pawimaw. Ringum tak le taima taka ei mawphurna hai hlensuok hi, ei rawngbawlna awm hrim a nih.