INHNU NGAILO PATHIEN

 INHNU NGAILO PATHIEN

Upa Zadinlien Hmar

Text : Nisienlakhawm a hunbi a hung kim khan, Pathienin a Naupa, nuhmeia inthawka pieng, dan hnuoia hung piengin, a tir suok ta a. Galati 4:4

Pathienin a zawlnei hai hmanga a lo puong, an lal Messia hung inlang hun ding chu Juda hai chun nghakhla takin an lo thlir a. Lalpa zawlneihai po po an re tawk tawk ta hnung, Lalpa thu hriet ding reng reng um talovin a um a. Hi hun sung hi mithiem hai chun Kum 400 vel zet a nih an tih. Chu chu Silent Period an lo tih. 

Kum 400 vel zet lien hnung, Pathien rawl hung inlang nawkna chu Nunghak thienghlim Mari kuomah a nih. Kha kum sung po po khan Pathien chu a to tawk tawknaw a, Lal Messi hung inlangna dinga Khawvel a buotsai dan hi tawite-in suklang ei tih.

1. Rom ram le Rom sawrkar: Krista Bethlehem-a a pieng laia Palistina ram awptu chu Rom Sawrkar a nih.Roreltu-a um mek chu Kaisar Augustus a nih. (BC 27 – AD 14) Hi hun lai hin Rom ram-awp chun khawvel ram po po chu a huom vawng ti thei a na. Khawthlang tiengah Atlantic tuipui chen, khawsak tieng Euphrates tuipui chen, Hmartiengah Rhine le Danube vadung, Simtiengah Africa hmartieng Mediterranean tuipui kam po po a huom a nih. Rom ram-awplo ram chite te um hai sienkhawm Rom sawrkar ta dingin an hnawksaknaw a, harsatna an siem ngamnaw bawk. 

A ram-awp sung po pova awlsam taka infepaw zung zung theina dingin lamlien infepawna tha takin a siem vawnga. A ram sungah muongna a um a, Krista hung insiengna ding le chanchintha puongdarna sin thawna dinga hmangruo pawimaw tak a hung inchang a nih.

2. Grik tawng le Grik Varna: Palestina ramsungah Aramaik tawng an hmang tlangpui a, a puotieng ruok chu Grik tawng an lar a. Grik tawng thiem ta ding chun khawlai hmuna khawm inzin velah harsatna a um nawh. Grik tawng hi a hausaa, thu khirkhan le Pathien thu hrilna ding lem chun a tangkai hle nin an hril. Hi lei hi ning a tih, Thuthlungthar khawm Grik tawnga ziek a ni nasan. Thuthlungthar ziektu hai hi a tam lem chu Juda hnama mi an nih, Aramaik tawngin ziek hai sien chu mi tam takin an tiem theinaw ding a na, thukhir le Pathien thu lem chu a ziek suok zonaw ding a nih an ti. Grik hai hi hnam var hmasa anni leiin an tawng a hausaa, lekhabu tam tak khawm an nei a, chanchintha hrilna dinga an tawng hmang tak khawm a nih.

3. Juda Sakhuo le Juda hnam indarhai: Juda hnam hai chu khawvel hmun hrang hrangah an um dara, Zawlneihai hrillawk Messia hung inlang ding nghakhla taka lo thlirtu hai an nih. Nebukadnezzar hunlaia Babulon saltang hnung khan Juda hai chu Palestina ram sunga nekin a ram puotienga um an tam lem tah a. Hieng Juda hnam indara um hai hi chanchintha hrilna kawngah hmangruo pawimaw tak an la hung ni pei a nih.

4. Khawvel nun beidawng hun: Rom 1:24-28 sunga ei hmu angin, khawvel mihriemhai chu suoksuolna tinreng thaw in hlimna an zawnga, an hmu nawh. Jentail hai khawm an sakuonaa chun an beidawnga, lungawina an hmu nawh. Hieng hun lai taka chanchintha hrilna hin nasatakin sin a thaw a. Ringtu hmasa hai chu Juda ni hai sienkhawm, Jentail hai laia chanchintha a hung lut china chun, Jentail kristien hai chu Juda kristien hai nek dai chun an hung tam tah a nih. 

Khawvel nun beidawng hun lai taka Krista hung inlang hi a nih inhnu ngailo Pathien hung inlangna chu. 

Galilee rama Kana khuoa inneinaa khan, Isu chu Uoin an tlasam thu Mari chun a hril a. Isu chun ‘Nuhmei, nanga mi lo lungkham pek ding ieng am a um a? Ka hun a la tlung nawh’ tiin a dawn a ni kha (Johan 2: 3-4). Pathien kut hung inlang hun dinga ei beisei hun hi, Lalpa hun ruot a ni kher ngai nawh. A hun taka inlang hlak, inhnu ngailo Pathien neitu hai ei nih ti hi hre a, ama mamawtu le nghaktuhai kuomah a hun takah a hung inlang hlak a nih.

A hmangai Lazar damnaw thu an hril a, a natna anthawk sukdam el thei dingin thilthawtheina a nei. Amiruokchu Lazar thi hnung Ni li zet liem hnungin, a farnu Martha khawmin “Lalpa, a thina ni li zet a liem tah, thu tang a tih’ a ti hnung khawmin, Thlan anthawkin Lazar chu a keitho a ni kha. (Johan 11) 

Mihriemna rama suong ding le bel ding, innghatna neia ei in ngai lai hin Lalpa thilthawtheina kut hi a hung inlang ngainaw a. Mihriem beiseina, inbuotsaina le thawthei intina po po a thlawn vawng hnung, Lalpaa cho beiseina ei nei pha a thilthawtheina kut a hung inlang hlak a nih. Lalpa hi an hnu ngainaw a, a huntaka inlang hlak, a mihai thangpui dinga inpei zing Pathien ei nei hi ei vangnei hle.

Lalpa nghakin I thung hlak maw? Lalpan a maksan ta che ah in ngai hlak am? Lalpa hi I ko pawp tanaw angin I hriet hlak am? I beisei hunah a hung inlang ngainaw maw? Beidawng lovin nghak la, inhnu ngailo Pathien chu a hun takah hung inlang hlak a tih.  

Lalpan malsawm raw se.

Amen