Hnuoi Silfen

 HNUOI SILFEN

-Upa Zadinlien Hmar

Text : Lekhaziektu le Farisai verekhai, in chung a rik! Thlan nal var, puotienga mawitaka inlang, a sungtieng ruok chu mithi ruhai le hmunhnawk tinrenga siphai ang chu in nih in sawnnaw. Matthai 23:27

English lekhaziektu hmingthang WB Yeats chun, ‘Had I the heaven’s embroidered cloths’ ti’n hlathu a lo ziek a. Puotieng inlang mawina hi mitin nuom le dit a nih ti chu ei hriet thei. A hlathu ziek chungchang hi ei hril tum tak a ninaw a, ei inthuomna silfen hai hi Lalpa lawmtlak a ni am ti hi ei hril nuom tak chu a nih.

(Chipchier taka ziek ka tum nawh, ngaituo sunzawm ding lemin)

Taksa silfen : 

Mihriemin ei mamaw em em, taksa muolphona tuommawi a, lum le deia taksa thununtu dingin silfen ei mamaw em em. Chu inthuomna silfen chun chul hun a nei a, triek hun a nei a, hnawl a ni hlak. Khawvel hmasawnna in a sawmsa laia pakhat chu incheina hi a nih. Design thar le Style dang dang, khawvel hmasawnna le inhmea inthuom le inbel a hung ngai pei hlak. Nunghak lem chun design suokthar uor hun laia a neinaw bik ni chu an nuom ngai nawh. Puotieng inlangnaa mawitak mi chawitu chu ei inthuomna hi a ni a, a pawimaw bawk a, a pawimaw tak a ninaw lai zingin uluk ding ei ni hrim a nih.

Pathien dit zawng incheina ruok chu puotieng inlang mawina ni lovin, lungrila thuhnuoirawlna le nuninnemna silfen chu a nih. (1Peter 3:3-4)

Nina silfen: 

Puotienga mi inzakaina le ditsak hlawna chu Nina silfen hi a nih. Khawtlang, Kohran – Local le Department hrang hrangah nina chanvo pawimaw tak tak chel hi thil tha tak a nih. Rawngbawlna a hin Pathien ta dinga rawngbawla ei in ngai lai hin mani rawng lo bawl hi thil awl tak a nih. Nina chanvo chela ei pensuok chun a milo lawmtu le ditsaktu ei mihriem pui lai an tam a, Pathienin mi lawm a ti’m ti ruok chu ngaituo um tak a nih. 

Hausakna silfen: 

Khawvela ei la leng sung hin chu taksa mamaw sum le pai, hausakna le neinungna hi ei pawimaw le mitin dit a nih. Mi hausa ta ding chun nun khawsak a awlsam a, mi inhnar le inza an nih. Kohran-a khawm a lukhaitu le mi inza, hnielruollova ngai an ni hlak. Tangka sum hi insung, Kohran le ram le hnam hmasawnna le in enkawlna dinga thil pawimaw tak el a nih. Suolin a hmang ruok chun sietna intluntu a ni bawk. Tangka sum ngaina hi suol tinreng bul a nih ti ei Pathien thua khawm ei hmu. (1Tim 6:10)

Ei hril nuom tak chu, khawvela hin taksa silfen mawi le tha, nina chanvo insang le ropui, hausakna silfen inthuomin, mi ditsak le ngaihlut ni inlakhawm, hieng silfen po po hi Lalpa hmaah hliptlaka  um a, ei nina ang anga ei inlang pha chun, Krista leia ei hliemna panser hi Lalpa hmaah inlangpui ding nei ei ti’m? 

Naaman inpharna chu a sipai hai hmaa chun a Uniformin hliekhu hlak sienkhawm, a room sungah a thuom a hlip pha chun inphar a nih ti anlang hlak. A ruka ei lo inpharna hai hi ieng silfenin am a mi hliekhu hlak a?

Khawvel mithmua mawi le tha, ropuiin ei inlang hlak, Lalpa hmaa hin mawiin inlang ve’ng ei ti’m? Thlan nal var, puotienga inlang mawi si, a sungtieng ruok chu mithi ruhai le hmunhnawk tinrenga sip ei ni el am ti hi ngaituo um tak a nih.

Inlang mawina dam, thuneina le nina chanvo insang le hausakna hai hi ei hnawl nawh. Hienghai hin Lalpa hmel hi hlienaw sien, a hmasatak chu Lalpa ni zing raw se.

Lalpan a thu malsawm sien, Lalpa malsawmna dawng dingin ditsakna vochuom kan hlan che.